Random story #1
Səhər
açılırdı. Vasiflə Günay onu özünə gətirməyə çalışırdılar. O soyuq tər içindəydi,
heç özündə deyildi və nəsə sayıqlayırdı. Otağa pəncərədən düşən gün üzünə düşüb
onu bir az da narahat edirdi.
- Təcili nəsə etməliyik ,Günay.
- Görəsən ona nolub?
Elə
bu zaman o nəsə mızıldanmağa başladı. Vasif qulağını onun ağzına tərəf apardı.
“B500,
B500... dərman... tapacaqlar.. dərman... məni tapacaqlar..”
- Ona nəsə dərman lazımdır,
Günay. Mən ona dərman tapmağa gedirəm. Sən də su tap, üzünə vur, bəlkə kömək olar.
- Yaxşı, tez ol!
Vasif
tələsik otaqdan çıxdı. Binanın pilləkənlərindən enib küçəyə qaçdı. Yaxınlıqda
gözünə dəyən ilk aptekə girdi və girən kimi nəfəssiz halda dedi:
- Kimsə var burda? Kömək
lazımdır.
İçərdən
bir nəfər ağ xalatlı çox sakit görünən oğlan çıxdı.
- Buyrun, nə lazımdır?
- B500 adında dərman var? Bir nəfərin
vəziyyəti yaxşı deyil. Sayıqlayır və elə bir dərman istəyir. Ona tez kömək etmək
lazımdır.
- Elə bir dərman adı yoxdur təəssüf.
Bəlkə sizə sakitləşdirici verim.
İçərdən
bir də orta yaşlı qadın çıxdı. Burda gedən söhbəti eşidib sanki narahat
olmuşdu. Oğlanla öz aralarında nəsə danışdılar və qadın dilləndi:
- B500 dərman deyil amma dərmanların
içində az miqdarda tapılan maddədir. Ayrıca tapa bilməzsiniz. Vəə bir də deyəsən
onu narkotik kimi də istifadə edirlər. Çox ciddi fəsadları olsa da effekti tez
keçir.
- Necə yəni narkotik??
Vasif aptekin qapısını çırpıb tez binaya
qaçdı. Pilləkənləri iki-iki tələsik çıxandan sonra otağın qapısını açanda az
qala onu sındıracaqdı. Təəssüf ki, qorxduğu başına gəlmişdi. Otaqda nə Günay
var idi. Nə də o. Vasif onun özünə gəlib Günaya nəsə edəcəyindən qorxduğundan
az qala ağlını itirəcəkdi. İlk ağlına gələn Günaya zəng etmək oldu. Telefonu əlinə
alanda bir az da dəhşətə düşdü çünki Günay 4 dəfə zəng vurmuşdu və Vasif heç
birini eşitməmişdi. Günaya zəng etdi. Elə birinci çağırışda Günay telefonu
açdı.
- Vasif, onu xəstəxanaya aparmaq
lazımdır. Tez maşının yanına gəl!
- SƏN YAXŞISAN? Günay!
Xətt
kəsildi. Vasif tələsik aşağı endi amma bu dəfə dayanacaq tərəfə açılan qapıdan
çıxdı. Mənzərə heç ürəkaçan deyildi. O maşının yanında asfaltın üstünə sərilmişdi.
Günay isə onun başını əlində saxlayırdı. Vasifi görən kimi qışqırdı:
- Tez gəl! Tez gəl aparaq xəstəxanaya
yoxsa ona nəsə olacaq!
Vasif
qaçaraq gəlib maşının qapısını açdı. Birtəhər onu arxa tərəfdə oturacaqların
üstünə uzatdılar. Günay da birtəhər onun başını əllərinə alıb oturdu. Vasif
motoru işə salıb dayanacağın çıxışına tərəf sürdü. Artıq xəstənin ağzında ağ rəngli
köpüklər əmələ gəlirdi. Yenə də sayıqlayırdı:
- Yox... tapacaqlar.. B500..
qaç..
Vasif
çıxışa yaxınlaşanda çox qəribə bir şey baş verdi. Qara rəngli minivan düz onların
üstünə gəlirdi. Minivan gəlib düz onların yolunu kəsəcək formada dayandı. Arxa
tərəfdəki qapıdan bir nəfər düşdü.
Comments
Post a Comment